I te Tonga o Awherika, e haruru ana ngā pito o te whenua rā i ngā whakanuitanga a ngā iwi mō Nelson Mandela.
Kei te pokapū o Soweto tā mātou karere a Raiha Johns, kei te tiriti o Vilakazi, ki reira ko te whare o Nelson Mandela i te wā i noho tahi ia me tōna wahine a Winnie.
Ko reo rōreka, ko waiata te kai mā ngā tāngata o Soweto i te rironga o Madiba.
Ko Hone Harawira anō tēna, kua whakawhiti ā-tinana atu ki te poroporoāki atu ki tētahi tino tangata, hei tā Harawira, i para tētahi ara nui whakaharahara māna hei whai.
Hei tāna, he wairua pai tō ngā hāhi nei. Ka mihi ia ki a rātou katoa, whakaharihari i ngā tāngata katoa i roto i tēnei pōuritanga nui kei runga i te ao whānui.
Nō ngā hāhi katoa o Awherika ki te Tonga ēnei tāngata, ā, me te pāti o ANC kua huihui mai ki te whakanui i a Madiba.
Nā rātou a Hone Harawira i tono kia haere mai. Ahakoa te rerekē o ngā whakapono, kotahi te aronga.
Hei tāna, "Harikoa ana au te kawe mai i ngā whakaaro nui, i ngā wawata i ngā hiahia o tōku iwi Māori."
He mea nui hoki ki a ia te kitekite, te waiata tahi me ngā tāngata o Madiba.
E ai ki a Harawira, "I ngā rā ō-mua ko tōna whare kei tēna taha o te huarahi o tēnei o ngā Stadiums o Orlando. Ko tōna whare me te whare o Bishop Desmond Tutu.
Nō reira, e tika ana ki te kite i ōna iwi."
I noho mai a Mandela me tōna whānau ki te tiriti o Vilakazi i ngā tau whā tekau, tae rawa ki te wā i mauherengia a ia. Ka hoki mai anō i te wā i wetekina ngā here.
Kotahi noa iho te rūma o te whare.
Hoki rawa atu ki Orlando, e kanikani tonu a Harawira. Kahore tonu kia whakatauria ki hea ia haere ai a ngā rangi kei te heke mai.
Hei tā Harawira anō, "Mena ka tāea e au te haere ki tōna rā nehu ki Qunu, ka haere. Mēna ka kore ko te hiahia kia noho ki konei mō te katoa o tēnei kaupapa."
He mihi ki a Madiba tōna aronga nui.
"Kua ora tonu tōna aroha mō tōna iwi, me tōna hoariri anō hoki. He tino rangatira a Madiba."
He wāhi mōrearea a Soweto i te nuinga o te wā. Engari kua tau te rangimārie hei whakaū i ngā wawata o Mandela, arā, ngā wawata o te kotahitanga.
