He whakatūpato mo te awa o Te Utuhina

Kāre anō te hunga kainga o Rotorua kia kaukau ki roto i te awa o Utuhina, pā tata ki te tiriti o roto nā runga i ngā whakatūpatotanga i uta ki runga i te awa i te tau ka huri.  Nā Toi Moana te rāhui i utaina ki runga i te awa nō te Hakihea ka huri, ā, kei te whai a Rawiri Waru tētahi e noho tata ki te awa, kia whakarauoratia ake te wai.  

He wāhi rongonui mō te hī taraute, engari kei te noho hawahawa kē, ā, ki te kore tātau e kaha ki te tiaki, ā, kua tino, kua raru tātau he taonga te wai. 

Hei hiki i te tuawhiti o te wai me heke te nui o te hauota e toru rau, rua tekau mano kiro i mua i te tau toru tekau mā rua.  Hei ko tā Rawiri Waru mehemea he hua kei roto, me kōkiri whakamua te whakaaro.  

E ai anō ki a Rawiri, "ko tētahi ōku kei te kī, kāre i te whakapono ki tēnā kōrero, ko tētahi taha kei te whai i ngā kōrero pūtaiao a te pākeha, engari kei te kite atu, ka kite atu aku kōeke i te wai nei na kei te rongo i te wairua, ā, kei te tangi mai te wai."  

Ki tā Karen Vercoe, kaiwhakakapi i te tūnga tumu whakarae mō te poari roto moana o Te Arawa, kei te mahi tahi rātou me ētahi atu o ngā rōpū ki te hiki i te tuawhiti o te wai.  Ko Rotoehu, Okaro tae noa ki te awa o Utuhina pātata ki te rori o Roto kua rāhuihia e te kaunihera o Toi Moana.

Ki tā Rawiri anō, "tana rere mai ki te roto nei na, āhua paruparu haere, ka mau ngā paru ki roto ka tahawahawatia te wai e ngā momo paru, kei te uru mai ki te wai nei na." 

Hei te marama e tū mai nei ka tū ngā hui tumatawhānui ki Rotorua mō ngā tikanga whakahaere hauota, heoi ko te whai matua kia aro ki te koiora o te wai ki te rohe.