He wikitōria ki te kāinga mā Awherika ki te Tonga ki te kapa Ōpango takiwhitu

Rahia Timutimu

Nō te ata tonu nei, whakamāui ake ai te kapa takiwhitu o Āwherika ki te tonga, ki te ārai i ngā Ōpango takiwhitu, i te wāhanga tauwhainga takiwhitu IRB i tū i Poi Irihāpeti i ngā rangi okioki kua hipa.

He ngāhuru mā whitu ki te ngāhuru mā whā te tāpeke whakamutunga.

I whakaueuetia te kapa takiwhitu nei e te matenga hinapouri o te tāiki ngāpara o Nelson Mandela.

Hoinano rā, nō te tau rua mano mā waru, koinei tō rātou wikitōria tuatahi i roto anō hoki i tō rātou ake taiwhanga tākaro.

I rangatū ngā Ōpango takiwhitu i ngā piro o Scott Curry rāua ko Sherwin Stowers, kia titoko atu rā ki mua he ngāhuru mā whā ki te kore te kaute, hoi, kua whakaora ake ano te kapa o Awherika ki te Tonga, i ngā waewae parahutihuti a Branco du Preez me āna pironga e rua.

Autō ana te kapa o Awherika ki te Tonga he ngāhuru mā whā ki te ngāhuru mā rua i te wā haurua, ā, i pākuru i a te kapene Blitzbokke, i a Kyle Brown te nēra whakamutunga ki te kāwhena, kia riro i a rātou te taitara toa mō tēnei wāhanga o te whakataetae.

Mā tēnei wikitoria ā rātou, e rua noa iho ngā māka e whakawehewehe nei i ngā Ōpango takiwhitu, me te kapa o Āwherika ki te tonga, i te keonga o te rārangi HSBC takiwhitu o te ao.