Kua wikitōria a Inia i te whakataetae kia Aotearoa i te tauwhainga he whā tukinga te nui, whai muri tā rātou tukinga whakamutunga inapō, he tahi ki ia kapa ki Otautahi.
I taikaha ake te āhua o te kapa Inia, i tō rātou āhua o tērā Rāmere ki Whakatū, ahakoa i hinga te tukinga tuatahi, i hoki mai rātou ki te wikitōria i te tauwhainga.
He uaua tonu mo ngā kapa e rua ki te wāwāhi i te taha ārai, kia whai piro ai ki te pāka o Marist.
I hiahia ngā kapa e rua i te wikitōria, ā, i kitea i te hia kai i te tuki a Brad Shaw ki te kaitākaro nō Inia, ki a Sunil Sowmarpet, ā, he kāri kōwhai te whiu, ka whakatahahia a ia mō te tekau mineti, heoi kāre i taea a Inia ki te whai hua, ahakoa te tokomaha ake kei roto i tō rātou kapa.
I te haurua tuatahi, kāre he piro i whai, ā, i te whā tekau meneti rā anō i eke a Nick Ross kia whai te piro tuatahi o te tukinga kia arahi a Aotearoa.
Heoi kāre i roa, ka kaha ake anō te au o ngā manuhiri, ka ōrite ai ngā tatau. I kaha aru a Aotearoa i te rārangi ārai o Inia engari tē taea te wehewehe, kia tahi ki ia kapa i te otinga ake, ko Inia i wikitōria i te tauwhainga.
Hei tā Colin Batch, te kaiako matua o te kapa, i whakareri tēnei tauwhainga i tana kapa Black Sticks mō te Ipu Oceania ki Stratford hei te mutunga o tēnei marama.
