Muia ana te whare hākinakina o Te Rakipaewhenua i te rangatahi mo ngā whakataetae poitūkohu mō ngā tau raro i te tekau mā iwa. I ahu mai tētahi ō ngā kapa wāhine i Te Tai Rāwhiti.
Mō te kapa wāhine poitūkohu nō Turanga, raro i te tekau mā iwa tau te pakeke mā te aha i te wikitōria kōtahi i te kēmu whakamutunga. Hei tā Janayah Lewis, nō Wairoa, e harikoa ana te ngākau kia hoki ki te kainga me te mōhio i wikitōria rātou i Tāmaki.
Mō te kapa nei, ko ngā wheakoranga o te takaro ki ngā rohe kaitā, ki ngā kaitakaro kaitā anō hoki o te motu te mea nui. Hei tā Lewis anō, nā runga i te mea kāore i te tino teitei o te taumata poitūkohu i Tūranga he pai noa te takaro ki ngā kaitakaro o ngā kapa ō Aotearoa.
Kua kite ngā wāhine me aha rātou e piki ai ki ngā taumata o rohe kē atu, ka mutu me aha rātou e pakari anō ai rātou. Ko tā Lewis titiro e pīrangi ana ngā kaitakaro katoa kia eke ki ngā taumata teitei, hēoi mā te pukumahi e pērā ai.
Mā te aha i te wikitōria kōtahi ki te kapa tuarua o Te Rakipaewhenua hei tūāpapa mō te poitūkohu i Te Tai Rāwhiti.
