He wikitōria te whāinga matua mō ngā Steelers i te Mitre 10 Cup

James Perry

Hei te pō nei timata ai te whakataetae whutupōro Mitre 10 Cup ki te Rakipaewhenua. E whakangungu tonu ana te kapa Counties Manukau Steelers mō tā rātou kēmu tuatahi hei te Rāhoroi. 

Ka tuki ngā Steelers ki te hoa noho tata ki a Tāmaki Makaurau ki Te Anawau hei te Rāhoroi. nei ki te hoa noho tata, ki a Tāmaki Makaurau. Ka rāhiri mai te kaiako a Darryl Suasua i ōna kaitākaro Super Rugby. Kua mahue te nuinga i ngā kēmu whakangungu i ngā wharanga, ture whakatā rānei, heoi e whakapae ana kei te pērā hoki ngā hoariri, ka mutu me āta tuitui anō rātou ki te kapa.

I puta te ihu o ngā Steelers i te kēmu tuatahi ō tērā tau, ko Tāmaki Makaurau tonu te hoariri, hei tā te kāpene, hei tā Sam Henwood kāore e kore e kimi utu ana a Tāmaki Makaurau. Hei tāna anō, kāore i kō atu i te turaki i ngā hoa noho tata, ka mutu mā te wikitōria e rite pai ai tō rātou whatinga.

I whai wāhi a Henwood ki ngā Hurricanes, ā i whai wāhi te pouwhītiki a Matiaha Martin ki te kapa Blues. E hiahia ana a Henwood kia tākoha i ōna wheakoranga, me ōna mātauranga hou ki tōna kapa, arā ngā āhuatanga ārai. Ko te mea nui i riro i ā ia ko ngā āhuatanga o te noho mātārae. Hei tāna, nā te noho ki te kapa me ōna tini ika a-Whiro i kite pū e ia i tēnei mea te ārahi kapa.

He mea whakakapi a Martin i ētahi tūranga i tā Tana Umaga kapa Blues, ko tāna ka whakahoki ki tōna orokohanga ko ngā pūkenga torohū e mārama pai ai ngā torekaihuruhuru ki tāna e kōrero nei.

Nōna i te kapa Blues i kaha tuki ia ki ōna hoatākaro o Tāmaki Makaurau, na whai anō e hikaka ana ia ki te tuki ki ōna hoa hei te Rāhoroi nei, hei tāna "ko rātou te big brother, te tuakana ko mātou te teina. Engari, ki a mātou ko mātou te tuakana."

I tata mahue te kapa Steelers i ngā whiringa toa i tērā tau mā te rima piro noa iho, e whakapeto ngoi ana te kapa kia eke rātou i tērā tau.

I mahue te kapa i ngā whiringa whāiti Mitre 10 Cup i tērā tau, kōtahi noa iho te wikitōria i te hiahia e rātou e eke ai rātou. Mā te wikitōria i te kēmu tuatahi e whakapono ai rātou ka hoki anō a Counties Manukau ki ngā taumata ikeike o Aotearoa.