Hei tā Nāhinara ko te tino hiahia kia kaua te hunga rangatahi e taka ki te rua o penihana

E ai ki te Minita Whakahiato Ora, ki a Paula Bennett, he whitu tekau mā ono ira rima piriona tāra te utu mō te katoa o te hunga penihana, Nā, he koni atu i te whitu tekau ōrau o tēnei hunga, ko ngā taiohi kei raro i te rua tekau tau te pakeke.

Nā whai anō te hiahia, kia whānui ake tō Nāhinara whakahaere i ngā whakapaunga pūtea a ōnā kaipenihana tamatāne, tamawāhine.     

Ko te hiahia nui a Nāhinara he arataki i te hunga rangatahi, kia kaua rātou e taka ki te rua o penihana.

A, mā te whakahaere i ngā whakapaunga pūtea a te hunga penihana tekau mā waru tau, tekau mā iwa tau te pakeke, ka tutuki pea i a rātou.

I raro i tēnei kaupapa ko tā te Manatu Whakahiato Ora, ka arotakengia te hunga wanewane penihana kei raro i te rua tekau tau te pakeke,

Mo ēnā e pokaikaha ana, ka tohungia rātou ki tētahi ratonga rangatahi. Ki reira, napinapitia mārika ai rātou e tētahi mātanga penapena pūtea me te whai wāhi ki tētahi kāri-moni.  

Tokotoru ngā uri whiwhi penihana i uiuitia i te rangi nei, ā, nō rātou ēnei whakaaro.

I tēnei wā tonu, e herea ana ngā kōhine, tamatāne tekau mā ono tau te pakeke, tekau mā whitu tau te pakeke i raro i tēnei whakahaere. Ko ngā utu o ia rā pēnei me te utu rēti, te utu hiko ka utua kētia e tētahi atu. Ko ngā moni hei utu i ngā kai, ka whakaurua ki tētahi kari moni, ā, horekau rawa e āhei ki te hoko waipiro, hikareti hoki.