Hei tā te Kāwanatanga ko te aro pū mā rātou ko te mate pukupuku

Ko te mate pukupuku te tino kaipatu o ngā mate katoa i Aotearoa nei, nā whai anō te aro pū o te Kāwanatanga ki tēnei mate.

Tata ki te katoa o ngā tūroro mate pukupuku ka whiwhi maimoa i roto i te ono tekau mā rua rā, i raro i tētahi mahere hōu, e toru tau te roa, a te Kāwanatanga. Engari, he pēhea nei tōnā pānga ki a Ngai Māori?

Kei te pū o tā te Minita Take Hauora mahere mate pukupuku mō te toru tau,ko tētahi huarahi rongoā tere rawa, e ono tekau mā rua rā te roa

Ki reira, aromatawaia rawatia ai ngā whakamātautau tuatahi tae noa ki ngā whakamātatau rongoā ahakoa hāparapara mai, hahau mai, iraruke mai.

Tūtaki mai ki a Edith rāua ko Wendy, nā raua i āki te kaupapa Whānau Ora Cancer Navigation, he kaupapa nā Te Hauora a Rohe o Waitemata me Waipareira i timata i te tau rua mano mā ono, ā, e whakahaere tonu ana e Waipareira i ēnei rā

Kātahi anō a Edith ka mutu i tana huarahi rongoā mō te mate pukupuku ki te whare tangata, ā, ko Wendy tonu tērā i arahi i a ia hei kaitautoko mōnā.

Hei tā rāua, me aro hoki te rautaki toru tau a te Kāwanatanga ki ngā hiahia a te Māori, i ngā tatauranga e mea ana ko Ngāi Māori tonu tēnā e pokea nuitia ana e te mate pukupuku.

Kei te takiwa o te rima rau miriona tāra te utu ki te mate pukupuku ia tau, ā, he ono ōrau tēra o ngā pūtea hauora a te kāwanatanga.

I te wā nei, kei te takiwa o te ono tekau ōrau o ngāi tūroro mate pukupuku e whai rongoā ana i roto i te ono tekau mā rua rā,

Hei te Hūrae rua mano tekau mā ono, ko te hiahia kia kake taua nama ki te waru tekau mā rima ōrau.