Hei tā te Pirimia ka tāea ngā uri o ngā hoea omua te haere ki Rānana mō te rā o ANZAC

updated

He pai kē te noho ki te kāinga i te haere ki Rānana mō te rā o ANZAC.  Koinei ngā whakaaro o tētahi o ngā mōrehu hoia o Te Taitokerau, i te rongotanga ake kua kapi kē te wāhanga mō te iwi o Aotearoa ki te tono kia haere rātou ki te ākau o Karepori, mō te kotahi rau tau nō te pakanga nui ki reira.

Nō tērā marama kapi ai te wahanga ma te iwi o Aotearoa hei tono kia haere-a-tinana atu rātou ki Karepori i tēnei tau.  Engari ki tāwāhi kua oti i te Pirimia a John Key he whakaaetanga e āhei ai ngā iwi o te kainga te haere kē ki Rānana mō ngā whakamaharatanga i te rā o ANZAC.

Hei tā te hoia omua, a Richard Shepherd, “Mā ētahi o tātou e nonoho mai ki te haukainga e tae atu e haere atu engari horekau mātou i mōhio nei ki ngā ballot, kua pau hoki te rā mo ēnā e mahi nei.”

Kua tatū i ngā kāwana o Aotearoa, Ahitereiria me Turkey kia tekau mano e rima rau katoa te iwi ka haere ki te ākau o Karepori mō te rā o ANZAC i tēnei tau. Arā, e waru mano tāngata nō Ahitereira, e rua mano tāngata nō Aotearoa. Engari e kore pea te iwi kainga e rata ki te whakapau moni hei haere ki Rānana kē.

Ki tā Shepherd, “Kia whakanui hoki i o tātou nei, ahakoa i roto o Aotearoa, horekau hoki te raruraru i kona, horekau hoki mātou e haere ki tāwāhi nei. I roto o Aotearoa he pai rawa.”

He mea nui ahakoa kei hea a te rā o ANZAC, kia whakamahara ia rātou i tū nui ki te ao kua whiti nui ki te pō.