Hei taunaki i a Dry July, e kohi pūtea ana a Ninakaye Taane-Tinorau mō te mate pukupuku

-Nā Kahumako Rameka, tauira kaipāpaho o Te Rito journalism.

E mōhiotia whānuitia ana e Ninakaye Taane-Tinorau mō āna mahi angitu hei kaitohu i tētahi pakihi waiata pūoro, he tuahine hoki ki te kaiwaiata rongonui a Tiki Taane. Engari i tēnei marama o Dry July, kei te whakarite a Ninakaye, kua neke atu i te rua tekau tau e noho pare ana i te waipiro, i tētahi kaupapa kohi pūtea e kī ana ko On The Waka, hei tautoko i ngā pārurenga o te mate pukupuku. 

Nāna te kaupapa o ‘On The Waka’ i whakamānu ai mō te hunga e whai ana i te ao waipiro kore, hei āhuru mōwai i ngā piere nuku kei mua i a rātou.

I tāna rangatahitanga ka taka ia ki ngā rāngai toukohi mahi ai, nā tēna ka tau mai ngā taumahatanga o te waipiro me te tarukino.

Nā te rāweke ki ngā warawara o te ao mō ngā tau, ka hinga ia i te hauhauaitū, te pōātinitini me te whakaruhi i te wairangi nā te waipiro me ngā tarukino. 

A, i tana hapūtanga tuatahi, ka huri te tai, ka hīnātore mai te māramatanga i tōna hinengaro ki te ara o te tika.

Ka whitawhita mai te ahi i roto i a Taane-Tinorau ki te tautoko i ngā whānau kua pāngia e te mate pukupuku, nā te ngau kino o te ngāngara i tōna whānau. 

Hei tā Taane-Tinorau kua penapena tōna toru mano waru rau taara i tēnei wā, ko te whāinga kia eke ki te rima mano.

Ko te manako nui ā 'On The Waka' kia tū hei āhuru mōwai mā ngā mema nei, kia waiho mā ngā whēako rātou e ārahi ki te ao waipiro kore, kaua noaiho mā te marama o Hūrae anake.