Henare warns against housing land grab

Ki take kē atu ka tūpono whānakohia anō pea ngā whenua Māori. Koia te whakatūpato a Peeni Henare, mema pāremata Māori o Tāmaki Makaurau, i te putanga kōrero a te Minita Take Whare, a Nick Smith, ko te Ture Mahi Tūmatanui ka tīkina atu ki te whakawātea whenua mō te whakatū whare. E whai ana tēnei i te whakapuakitanga a te Pirimia mō te kotahi piriona tāra hei rongoā i te noho kore kāinga.

Te ahua nei ka whai oranga te reo Māori ki anamata.  Engari e ai ki te kaitorangapū Maori a Peeni Henare, engari anō te oranga o ngā whenua Māori.

Hei tā Henare, “Ko enei ture te tuapapa mo te mahi tahae i wa tatou whenua no reira ka raruraru tatou ano te Maori mena ka whakatutuki te hiahia a te Minita.”

E ai ki nga whakamārama ki a Te Kāea, ka tiro ake te Minita Take Whare a Nick Smith ki tetahi kitenga a te komihana Productivity, mā te ture Public Works ka whakawātea etahi whenua mo te whakatū whare.

Hei tā Marama Fox o te Pāti Māori, “Haere ki te rapu i to ake whenua, kei to ake rohe kei roto i te ringa a te Pakeha, he paku noa iho ki te ringa a te Maori me waiho te whenua ki te ringaringa a te Maori.”

E ai ki a Fox, kua whanui ake ngā raru kaingakore, nawai nawai ka tae atu tēnei take ki tōna ake kuaha.

Hei tā Fox, “Kei taku whare tetahi whanau e moe ana, kaare ratou e kimi tetahi whare ki Poneke nei, ehara i te mea kei Tamaki Makaurau noa iho.”

I tera tau na te whakamā i patu i a Smith mo te whakatau a te kāwanatanga kia hokona atu nga whenua a te Karauna ahakoa kaore ratou i korero ki Ngāti Whatua. Na to rātou whakataunga tiriti te mana tuatahi ki te hoko i ngā whenua.

E ai ki a Henare, “Ko te nuinga o nga whenua katahi ano kua whakahokia mai ki te Maori ko nga whenua e hiahia ana te kawanatanga te whakatu whare, ara  ka raru a Tamaki Makaurau, ka raru a Tauranga Moana, ka raru nga taone nui.”

I whakapā atu a Te Kaea ki te Minita a Nick Smith engari auare ake. Heoi e ai ki a Fox, me tutaki a kanohi a Smith me Key i te hunga kainga kore kia mohio ai rāua ki te hōhonutanga o tenei raruraru.