Hīkaka ana ngā ākonga Māori kia tū hei māngai mā ngā Vodafone Warriors mō te Huinga Rangatahi NRL

Rahia Timutimu

Tokowhā ngā tauira Māori kua whai tūranga hei kanohi mō te karapu Vodafone Warriors ki te huihuinga Youth Summit hei tērā wiki, ki Te One Koura, i Ahitereiria.  

Ka ako tahi rātou me ētahi tauira iwi taketake o Ahitereiria, ā, ko tētahi mea whakahirahira o te haerenga, ko te mātaki hoki i te tukinga NRL All Stars ka tū hei taua wiki.

Koinei te wā tuatahi kua mātaki ā-tangata nei ēnei tauira tokowhā i ō rātou toa NRL.

Hei te Rāmere ā tērā wiki, ka waimarie anō rātou ki te mātaki i te tukinga NRL All Stars, i tā rātou haerenga ki te huihuinga Youth Summit ki te One Koura i Ahitereiria.

Tokomaha ngā tauira i whakatū i ō rātou ringa kia haere ki te hui hei māngai mō te kapa Vodafone Warriors, otirā, tokorua ngā tauira nō Ngā Tapuwae, tokorua hoki nō Hoani Waititi i waimarie ki ngā tūranga e whā.

Ka piri rātou ki ētahi tauira iwi taketake nō Ahitereiria e rima tekau mā ono i te huihuinga, ka whai wāhi ki ētahi momo akoranga ahurea, kaiārahi hoki.

Ka ahu atu ngā tauira ki Ahitereiria hei te Rātū e tū mai nei.