Neke atu i te kōtahi mano kaitākaro i tōpū atu ki Tauranga i ēnei rā whakatā, mō te whakataetae HoopNation.
Ko te whāinga matua o te whakataetae nei kia puare huarahi hou mō ngā kaitākaro poitūkohu.
Nā Paul Berridge me KJ Allen te kaupapa nei i whakatū i te tau 2011 ki Whanganui. Tekau mā tahi noa ngā kapa i uru i taua wā.
Hei tā te tokorua nei o te awa o Whanganui, kei tāwahi te titiro i tēnei wā. E kainamu ana tētahi waitohu whakaaetanga ki whakawhanake te kaupapa o HoopNation ki ngā whenua o Āhia.
Heoi hei te tau e tū mai nei ka kawea e rāua tētahi kapa ki te whakataetae taiohi kaitā rawa o te ao ki Poipiripi. Hei tā Berridge, he huarahi anō e whai wāhi ngā taiohi o te motu, ka mutu ngā taiohi Māori, o ngā Moutere anō hoki kia whakaatu i ngā pūkenga ki ngā kaiwhiriwhiri o te Ao.
Kua roa a Jeff Green e tautoko ana i te whakataetae nei. Kua kite e te kaiako ika a-whiro i ngā hua e whāia nei e te tokorua. Hei tāna, kātahi anō te whakataetae NBL i Ahitereiria kia timata, heoi he wā tēnei kia tākaro tonu ngā kaitākaro poitūkohu mō te tūpono ka whai kirimana ki ētahi kapa ngaio i kōnei, i tāwāhi rānei.
Hei tā Green anō, ahakoa kua tata rite ngā kaitākaro Māori tāroaroa ki te moa, inā ngā pūkenga o ngā kaitākaro Māori, ā koirā te painga o ngā whakataetae nei.
Hei te otinga o te whakataetae nei ka whakaingoatia i tētahi kapa tāne ka whai wāhi ki te whakataetae Jump Ten i Haina. Kei tōna $200,000 te rahi o te pūtea ka riro ki ngā kapa, heoi hei tā KJ Allen kāore tērā i te whāinga matua. Ko te kawe i ngā kaitākaro ki Āhia, kia kite e ngā kaiwhiriwhiri o ngā kapa i reira. Hei tāna anō ko Āhia te rohe e tino tipu ana te poitūkohu i tēnei wā.
Ko Steven Adams tētahi kua puawai i te HoopNation i roto i ngā tau, ā ko te tūmanako ia ka whai tonu ngā kaitākaro i tōna huarahi, e whai hua tonu i te whakaaro i tipu ki te Awa Tupua, ā e tipu tonu nei.
