E ai ki ētahi uri he wero nui ma Tuhoe te tū mana motuhake.
Hei tā Paki Nikora (Ngāti Rongo, Tūhoe), “E kī ana ko te mana motuhake kei te iwi, engari, ki a au nei nā, e rua ngā kaupapa: ko te mana me te tino rangatiratanga o ngā hapū me te mana motuhake o te iwi, nā reira ko tēhea te tuakana o ngā mea e rua.”
Kei a Te Uru Taumatua te mana whakahaere i ngā rawa a te iwi. E ai ki te Heamana o TUT a Tamati Kruger kei te hiahia te iwi kia noho mana motuhake ngā utunga penihana, ngā kura, ngā mahi hauora me ngā take whare ki tana rohe mai i Whakatāne whakatetonga ki te awa o Waikaremoana.
Ko tā Merehake Waaka (Ngāti Tawhaki, Tūhoe), “Ko tāku ki a Tūhoe e noho mai i waho o Ngāi Tūhoe, kia kaha te whakauru mai ki roto i ngā kaupapa a tō hapū, nā te mea kei reira te mana motuhake mo rātou.”
I tēnei hui ahurei ko tetahi atu o ngā ākinga nui kia mau ki te reo o Tūhoe.
“Ko te tangata e whakatipu ana i tana whānau i roto i tōna reo rangatira, ka tipu ngā tamariki ki roto i tētahi ātaahuatanga, hōhōnu. Haunga, kei kona te mahere, te rautaki hei ārahi haere i te ara, whakatipuhia,” tā Taiarahia Black (Ngāti Koura, Tūhoe).
I ngā tau ki muri, he kōrero noa iho te mana motuhake o Tūhoe, i tēnei rā, he tūahuatanga ka tāea.
