I haere ngā tamariki o Tūhoe ki te Whare Pāremata

Ao ake i tā rātou haerenga ki te Kura Pirihimana, kua tae ake tētahi ope tamariki nō Ruātoki i pākinotia i te urutomohanga o Tūhoe i te tau rua mano mā whitu, ki te Whare Pāremata.

I reira tā mātou karere a Ripeka Timutimu e whai haere ana i a rātou i te tūtakitanga atu ki te Minita Whakawhanake Take Māori, ki a Te Ururoa Flavell.  

E ahu whakamua ana rātou, kua tata ita anō te here.

Hei tā Tame Iti, “Koinei me haramai rātou, kai kite ai rātou kei konei ngā kōrero koinei te whare whakamana, whakaoho, whakatumatuma i ngā ture e pā ana ki a rātou.”

He ao hou ki ēnei uri o te kohu.

Ko tētahi o ngā tāngata i tūtaki ki a rātou ko te kaitōrangapu mō tō rātou rohe o te Waiariki.

Mō Michael Mclutchie, tētahi o rātou e pāngia, he whare manakore tēnei.

Hei tāna, “He whare noa iho tera ki ahau nei, nō tō tātou marae koina te Whare Paremata ko tō tātou korou kuia te poutokomanawa o tō tātou whānau hapū rānei.”

Engari mā te wā pea ka whai rongoa ai a McClutchie me tōna whānau.

E ai ki a McClutchie, “Ki āhau nei ki te rapu utu koina taku whakaaro tuatahi, engari ko te taha o te wairua, nā te atua hei rapu utu mō tātou o Tūhoe.”