I hoki atu tētahi mema o te pēne The Eagles, a Joe Walsh, ki Te Matau-ā-Maui

E rua tekau tau ki muri nei, ka whakaohotia ā-wairua nei a Joe Walsh, mema o te rōpu rongonui 'The Eagles' nōna i roto i a Kahungunu.

I reira ka tīmata tāna oranga ake i te mate poro haurangi, kai-whakapōauau, ā, e kore hoki e ārikarika ngā mihi a ngā mema kēnge o Te Matau-ā-Maui ki a ia, mōna i whakatuwhera ake ai i te tatau pounamu ki waenga i a rātou.

Me uaua ka rongo koe i tētahi whakaaturanga motuhake o tētahi o ngā hau tipua o te ao puoro rock.

He kōrero āwhina tā Joe Walsh i aia i Aotearoa nei, he kōrero i kōrerotia e ia i te tau rua mano mā whā ki ngā mema kēnge o te mangu kaha me te māpu mangaru i tētahi wānanga e toru ngā rā te roa ki Te Matau a Māui.

Ki konei i Otatara Pā, te wāhi i whakaoho ake ai tōna taha wairua i ngā tūpuna Māori, i reira timata ai te whakaora i aia anō.

Koira tērā i te tau waru mā iwa i aia e haere ngātahi ana me te peene Herbs i te Sinners Tour. I taua wā, i warawara ia ki ngā whakapōauau me te waipiro.  Engari, hei tāna nā taua wā i Otatara Pā i ora tonu aia.

Kei te tata ia ki te whitu tekau ngā tau, engari, kei te whakaweawe tonu ia i ngā tāngata, ehara mā ōna puoro noa iho engari mā ana kōrero hei momo koha aroha.