I hui tahi a Nāhinara me te Pāti Māori

Ao ake te rā, kua whai wāhi atu anō te Pirimia ki te wānanga i te whakaaro, he aha rā ngā kai ka horahia, ina whai tūru ngā rōpu whaiti ki te tēpū o te Kāwanatanga o te rā.

Ko United Future, Act rātou ko te Pāti Māori ērā kua hui tahi me John Key rātou ko ngā mema matāmua o Nāhinara, ā, i te ata nei, ka tūwhera ngā tatau ki te Pāti Māori.  

Puta mai ana, te kaiārahi o te Pāti Māori me ngā mareikura o te rōpū, i runga anō i te karanga a te Pirimia, a John Key.

Ao ake i te huinga tuatahi o John Key me te kaiārahi o United Future, a Peter Dunne, ka rere hoki te reo pōhiri ki Te Pāti Māori me te Rōpu Act hoki.

Hei tā John Key, ko te tūranga Minita Māori tonu tērā ka whaia rawatia pea e Te Ururoa Flavell.

Ko te Minita o mua mō Whānau Ora, ko Tāriana Tūria hoki tērā i whai tūru ki te tēpu kōrero, a, toko ake ana te pātai mena rā ka noho tonu te kōpaki mā te Pāti Māori hei kawe, mēnā hoki ka riro pea tērā tūranga i a Marama Fox, ki te kuhu atu ia ki Paremata i runga i te rārangi o te Pāti, whai muri i te putanga mai o ngā tatau pōti motuhake.

Hei tā Te Ururoa Flavell, ka hoki atu te Pati ki o rātou kai-tautoko ki te kimi haere i ngā whakaaro mō tētahi whakaetanga mahi tahi anō pea ki a Nahinara.