I hui tahi te hunga rangatahi o Waikato-Tainui ki Tāmaki

Koinei te wā tuatahi kua rūnanga atu te hunga rangatahi o Waikato-Tainui ki Tāmaki mō te huinga rangatahi ka whakahaerehia e te iwi ia rua tau.

Me te aha, arā te hunga noho tāone e hiahia ana ki te ako i ngā kōrerō tuku iho e pā ana ki te Kīngitanga.

I tae tawhiti mai, a Sheryl Rangi mai i Poihākena ki konei ki Te Puea Marae.

Kei te takiwā o te 80 tāngata kua rehita atu ki te Hui Rangatahi o Waikato Tainui kia taea ai e rātou te ako, te whakawhanaunga me te whakawhitiwhiti kōrerō ki te hanga rautaki anga whakamua mō te iwi.

E ai ki te kaiwhakahaere rangatahi, a Huirama Matatahi, "Ko te tuku me ki i ngā akoranga kua tukua mai e ngā kaumātua, e ngā tūpuna ki roto ki tēnā, ki tēnā o tātou kia whakapuea ake, kia whakapuawai ake ki te ao."

Hei tā Rewiri Waaka, "Ki te āta whakarongo ki ngā kōrero maha, ki ngā kōrero tino nui e pa ana mō te Kingitanga mai ētahi atu o ngā rangatahi o Waikato, ae koira te mea nui ki ahau."

Mo te hunga rangatahi nei nō Tuakau, ko tā rātou, he wā anō tēnei, kia whai wāhinga atu rātou ki tētahi kaupapa nui.

I roto i ngā rā e rua ko te heke, ka puta atu te hunga nei ki te ako i ngā hitoria a Waikato-Tainui i Tāmaki nei, ā, ka hopukina ētahi o ngā kōrerō mā roto mai i te hanga ripene ataata.