Kei Papaioea Te Pāti Māori e hui tahi ana me āna mema tautoko no roto i te rohe o Te Taihauāuru. Ki reira whakamōhio atu o rātou whakaaro ina ka noho ngā māngai o te Pāti Māori ki te tēpu kāwanatanga.
Ko Buff Matenga te heamana o te peka o Te Tai Hauāuru a te Pāti Māori, te turu i puritia e Tariana Turia - te turu i ngaro i te Pāti Māori ki a Reipa.
Heoi, e ai ki te Pāti Māori karekau he hua kua puta i a Reipa i ngā tau e ono kua hori, ā, ka pēra hoki hei tā rātou i ngā tau e toru kei tua. Nōreira, te whakapono me noho ki te tepu.
Ko tā Te Ururoa Flavell i ēnei hui he whakatakoto i ngā hua o roto i te pōhiri a John Key hei wananga mā ngā mema.
Tuatahi, ka whakapakari, ka whakawhānui ake a Whanau Ora. Apiti atu ko te hunga rawakore me ngā tūranga mahi ka whai wāhi nui, tuia ki tēna ko te ōhanga Māori hoki.
He hononga anō rā tēra o te ōhanga ki tera o te kore mahi nōreira ko te whakatata mai i ngā mea e rua kia taea ai te kite i ngā hua o tēra momo noho, kei te rata mai te pirimia ki tēra momo whakaaro, ā, ko te whakatinanatanga kei reira te uauatanga.
Ko ngā tūranga minita hoki tēra ka tukuna i roto i te whakaaetanga. Ko te hiahia kia noho tonu te rangai Take Māori, Whanau ora ki te Pāti Māori. Heoi, e ai ki a Te Ururoa Flavell ka whānui ake pea i tēna.
Kāti, katoa tēnei whakaaetanga e tarewa tonu ana i te kautehanga o ngā pōti motuhake hei tēnei Rahoroi, e kite ai pēna ka uru mai a Marama Fox ma te rārangi, kahore rānei. Ma reira e reka ake ai, e kawa ake ai rānei ngā kai i te tepu kāwanatanga.
