I hui te iwi kāinga o Ihumātao me te Kaunihera o Tāmaki Makaurau i te rangi nei, ki te tuku i tētahi penihana me te īnoi kia mutu ngā mahi whakawhanake whenua ki tō rātou takiwā.
Whā rau waru tekau ngā whare ka whakatūria ki te whenua o Ōtūtaua, ki ngā pārae o Māngere, engari e āwangawanga ana te iwi kāinga ka noho ko te mauri rirerire o tō rātou kāinga hei papa.
Haruru ana te Whare Kaunihera i te taenga atu a ngā iwi whai pānga o Ihumatao ki mua tonu i te aroaro o te Koromatua, ki te whakatakoto i tā rātou kaupapa.
He take i hua ake nā runga i te whakarite a te kaunihera kia hangaia he rōpū whare e kiia nei he Special Housing Area, ki te ara o Ōruarangi i Ihumātao, engari kīhai te iwi kainga i whai wāhi ki taua whakaritenga.
E ai ki a Cameron Hockly, “Kei te tino hē, na te mea kei runga i te whenua ngā taonga, ngā wāhi tapu nunui ki ēnei whānau, ki enei iwi, ki tōku whakāro he kaupapa mō te Taraipunara.”
Ki tā Marama Davidson, “He kaupapa nui mō Te Waiōhua, he kaupapa nui mō ngā hapori o te motu nē, ko tēnei mahi e pā ana ki te reo o te hapori hoki, e pā ana ki te whakamana i ngā tāngatawhenua ngā manawhenua o te hapori.”
Ehara i te mea i ngāwari noa te haere o te kaupapa, inā tutū ai te puehu i waenga tonu i te Koromatua me tētahi o ana kaikaunihera.
Hēoi kua takoto te kaupapa, ka whai wāhi te Koromatua me āna kaikaunihera ki te āta whakaaro he aha te huarahi anga whakamua engari hei tāna, e kore rawa e tutuki i tēnei rā tonu.
