I kōrero Te Kotahitanga o Ngā Hapū o Ngāpuhi mō ngā mahi a Raniera Tau

Mā Ngāpuhi anō a Ngāpuhi e whakatau.  Koinei te ia o ngā kōrero a Te Kotahitanga o ngā hapū o Ngāpuhi ki ngā whakapae mahi tinihanga e uta ana ki runga i tō rātou heamana-ā-iwi. 

E ai ki a Te Raa Nehua, “Me pēnei te kōrero ka tangi te titi ki tangi te kaka ka tangi te kereru ka tangi hoki ahau.”

Ko ngā mahi a te heamana-a-iwi o Ngāpuhi kei runga ake i ngā kōrero a Te Kotahitanga o ngā hapū.

Hei tā Hine Puru, “Mēnā e kī ana o tātou ngāhere i te manu e kore tātou e raruraru, ko tērā kē taku titiro ki tēnei.  Mēnā a tātou e hiahia ana a Ngāpuhi mā tātou a Sonny e kōrero mā tātou e kōrero.  Kaua e tukuna mā te Pākehā e kōrero.”

He tohu tēnei ki tā te heamana takirua o tēnei rōpū, kua roa kē te kaupapa o Tūhoronuku e hē ana.

E ai ki a Pita Tipene, “I hē i te tīmatatanga, i hē tonu ana i tēnei wā.  Ko te āhuatanga e pā ana ki te kūkupa,ahakoa he kaupapa tino nui i runga anō i te kaitiakitanga o Ngāpuhi me te whakamā o Ngāpuhi ki ēnā āhuatanga, ā, e hoa ko te kaupapa nui ko te hē a te kaupapa o Tūhoronuku.”

Ahatia tō rātou whakahē ia Tūhoronuku pau te kaha, he nui te tautoko o tēnei minenga mā Ngāpuhi anō e whakatika mai i te āhuatanga kua pā ki te heamana o Ngāpuhi, kauaka mā ture Pākehā.  Me te tono anō a ētahi kia haere a Ngāpuhi ki Te Waipounamu whakapāha ai.

Ki tā Kingi Taurua, “Kua whakatakotohia e au tēnei kaupapa ki mua i te aroaro o te hui inaianei, nāreira ki ōku whakapae ka tautokohia tērā kōrero me hīkoi a Ngāpuhi ki Te Waipounamu ki te whakapāhā mō ngā mahi tinihanga i utaina ki runga i tērā iwi.”  

E ai ki a Te Raa Nehua, “Kia kaua e rite ai a tātou manu kereru, kūkupa rānei, ki te moa!”

Heoi anō, mō tēnei wā kei te noho kūku te heamana o Ngāpuhi ki te kainga.