I ngāwari rawa tā Te Matau a Maui whakangungu tuatahi i te Hīra Ranfurly

Rahia Timutimu

I ngāwari tā Te Matau a Maui whakangungu i te Hīra Ranfurly, tā rātou tukinga whakangungu tuatahi i turaki i a Ōtākou ki te pāka a McLean.

Whai muri tā rātou kapo ake i te taitara i a Tāmaki ki te Tonga, i whakaatu te kapa Magpies i te take ko rātou tētahi o ngā kapa toa o te whakataetae i tā rātou turaki i te manuhiri, he whā tekau mā tahi ki te kore.

E kore tētahi i matapae ake ka pēnei rawa te ngāwari o tā Te Matau a Maui whakangungu tuatahi i te Hīra Ranfurly.

I te mēneti tuatahi o te tukinga, i whakaatu te hau kāinga i tā rātou hiakai kia noho te hīra nei ki reira, me te whai i te piro tuatahi ki te kokonga māui.

I pēra anō a Ryan Tongia, heoi ki taha kē atu o te pātiki, whakawhiti atu ia i te rārāngi piro, ā, kāore i mutu i reira.

He toru ngā wā i whakawhiti ai Te Matau a Maui i te pae piro, kia puta ki mua, he toru tekau mā tahi piro ki te kore.

I te haurua tuarua, i tata hipa te manuhiri i te rārangi piro, heoi, kāre i whai hua i te papa tātai.

Engari anō te hau kāinga, i māmā te eke anō.

Mō te wā tuatahi i ngā tau toru tekau mā tahi, kāre i eke a Ōtākou i te papa tātai.  Ko te hoariri kei tua i ngā kaipupuri i te hīra, ko Te Waiariki, ka tuki hei tēnei Rāhoroi.