I puta ai te hunga rangatahi turi ki waenga i te hapori ki te whakanui i "Te Wiki o te Rangatahi"

I raro i te whakatauki "Ko mātou te ao o āpōpō", i puta ai te hunga rangatahi turi ki waenga i te hapori ki te whakanui i "Te Wiki o te Rangatahi".

Ko te whāinga anō a ngā tauira o te wāhanga Tū Kokiri mai i te Kura Mātauranga Turi o Kerehana, he whakaatu i te reo ā tohu ki te hapori, me te aronui anō ki te hunga i pokea e ngā rū whenua o tāwāhi.

Nā te hunga rangatahi turi te whakaaro kia puta ki waenga i te hapori, ki te tūtakitaki, te whakātu i te Reo ā Tohu o Aotearoa, me te whakanui anō hoki i te kaupapa o tenei wiki, e kiia nei ko te Wiki o te Rangatahi.

Hei tā Carl Ross, “Kei roto i Aotearoa katoa ngā tauira kei roto i ngā kura, haurua o ngā tamariki e turi ana, inā te tokomaha o ngā tamariki turi he tamariki Māori, nō reira ko tō mātou mahi ināianei he whakatū i tētahi Rautaki Mātauranga Māori hei tautoko i o rātou hiahia, o rātou moemoeā ki te whai mātauranga o te ao nei.”

Tua atu i te whakanui i te Reo ā Tohu, he kaupapa anō hei kohi pūtea, na runga i te ngākau aroha a ēnei rangatahi mō ngā whānau turi o tāwāhi i haukerekerehia e Tāwhirimātea.

E ai ki a Ross, “Mā rātou mā i te rā nei ki te mahi i ngā hōtiti, kohi i ngā pūtea, he whakaaro rangatira, anei ki te whakāko ki ngā tāngata wētahi o te Reo ā Tohu, kia whakawhānui te whakaaro, he reo, he reo anō.”

Otirā, he maha tonu ngā mahi kei mua i te aroaro, ki te hāpai i te Reo ā Tohu, heoi mō ēnei rangatahi turi, kei te kitea he maha ngā iwi hapori kei te tahuri mai o rātou tautoko, o rātou āwhina.