I ruku ngā tamariki o Te Wharekura o Ruatoki ki ngā ahuatanga o te pūtaiao

I ruku ngā tamariki o Te Wharekura o Ruatoki ki ngā ahuatanga o te pūtaiao i tēnei rā.  I whakaatu te wāhanga Pōtiki o te kura i o rātou mahi ki o rātou hoa, kaiako me te hāpori.

He rā tēnei kia kite ngā tauira mai i Ruatoki i ngā ahua o te pūtaiao.

E ai ki tētahi o ngā kaiako o te kura, a Margaret Nicholas, “Ko te kaupapa i whakatauhia mātou mō te wai, wai Māori mō te kōawa pēhea tōna āhua ka tāea ngā tamariki te wherawhera i ngā tūmomo āhuatanga e pā ana ki te kaupapa o te pūtaiao.”

Ki tā Iwitoa Kruger, “Ka tāea e au te puta ki te whakaako i aku mātua, taku whānau pēhea te mahi ēnei mea.”

Hei tā Te Rauaroha Smallman, “Ko te mea pai ki ahau i roto i te pūtaiao he mātauranga.”

Ka nui ngā reanga kua kohia e Whāea Nicholas ki Ruatoki engari kei te rerekē haere te takoto o tōna hapori.

Ki tā Nicholas, “Ko tēnei te ao pūtaiao e mōhio nei tātau huri atu, huri mai, kei runga katoa ngā tamariki i ngā wāea pūkoro, e karawhiu ana i ngā kaupapa puta i te ao, nō reira ko ta mātou tiro whānui, ā, ko te whakahoki mai te tuāpapa o te pūtaiao ki te ao tonu o ngā tamariki o Ngāi Tūhoe.”

E ai ki a Maumahara Heremia, “He pai, he pārekareka ki au whakaputa i ngā whakaaro a ngā rūma, ngā kaiako hoki.”

Hei tā Taratoa Harris-Anderson, “I mekemekehia ngā kara, ngā kara e rua ko te whero me te kikorangi ka uru mai te kara waiporoporo.”

I tino aro ki ngā whakaaturanga pūtaiao e te hāpori, me te whakaaro anō kia whakatū tēnei kaupapa ia tau.