I tau te porotēhi mō te pananga o ētahi kaumātua nō Ōmaka

I tū porotēhi ngā kaitautoko i tētahi tokorua kaumātua ki waho atu o Ōmaka Marae i Wairau, hei whakahē i te pānui pananga e iwa tekau rangi te roa i tukuna ki a rāua, i mutu ai i te rangi nei.

Hei tā te komiti o te marae, i tukuna e rātou tēnei pānui ki a Doug Cunniffe whai muri i tāna takahi i te whakaaetanga rēti.

Koinei te kāinga o Doug rāua ko Ina Cunniffe mō ngā tau tekau mā ono kua horī.

Ko te hiahia o tēnei hunga, kia whakakorengia te pānui pananga, kia noho tonu ai a Doug rāua ko Ina ki tō rāua kāinga.

Ahakoa he porotēhi rangimārie, mārakerake kītea ana ngā kare ā-roto i te aukatinga o rātou ki runga i te marae.

Hei tā te kōmiti o Ōmaka Marae, i tukuna te pānui pananga ki a Doug Cunniffe whai muri i tana auwaha ki ngā mahi o te marae e whakahē hoki ana i ngā tikanga me ngā uara e tiakina ana ki te marae.

Hei tā Kiley anō, kua roa nei rātou e ngana ana kia whakatikaina ēnei take me Doug engari auare ake.

He kaupapa rēti tēnei tā te kōmiti, nā reira ka whai tonu rātou i tēnei ara ki tōna mutunga.