Ko te rangi tuarua tēnei o ngā whakataetae Manu Kōrero ā-motu i Te Matau a Maui, ā, ko ngā teina i ngā wāhanga o Te Rāwhiti Ihaka me Tā Turi Kara i eke ki te papa whakatūwaewae.
Ko ngā puru taitama o Hato Paora ēnā i eke ki te papa whaikōrero ā-motu. Ā, ahakoa te rangatahi hoki o te hanga, kaumatua noa ngā whakaaro i huaina.
E rua ngā kaiwhakataetae nā Te Wharekura o Ruatoki i toko ake ki te pae.
Mō Tomairangi Mariu e tū ana ki te wāhanga reo Pākehā o Tā Turi Kara, he huarahi whaia tēnei e ngā tapuwae o ōnā pākeke.
Ko Tīmoti Tiakiwai tēnā e tū nei ki te wāhanga reo Māori o Te Rāwhiti Ihaka. Hei tāna, he waha i ōnā tirohanga ki te ao o te rangatahi.
Heoi anō, aianei ake ka tohua e ngā kaiwhakawā ko wai rā ngā pūkōrero o te motu, ā, pērā ki ngā toa ō-mua, ka tau ko ō rātou ingoa ki ngā whārangi hītoria mō ake tonu.
