I whakanui te tini me te mano i te huritau kotahi rau o te whare tīpuna o Kahuranaki Marae

He kotahi mano neke atu ngā tāngata i tae atu ki te pitopito kainga o Te Hauake hei whakanui i te kotahi rau o te whare tīpuna o Kahuranaki Marae, te whare tuatoru i whakatūria whai muri i te turakitanga o ngā mea e rua o mua.

Hoa mai, whanaunga atu, tae atu ki te kāhui ariki me ngā māngai nui, katoa I hoki ki te kainga ki te rā whakanui nei.

E ai ki a Meriurukore Hapuku, “Mai Te Waipounamu, mai Akarana, kei te haramai rātou katoa ki konei ki te whakahirahira tō tātou marae nātemea koina tō tātou marae ehara nāku nā tātou katoa te marae nei.”

Ko te tuatoru o ngā whare tīpuna Kahuranaki tēnei, he tohu mō ngā tikanga tuku iho, kotahitanga me te whanaungatanga.

Hei tā Timi Te Po Hohepa, “Ngā koroua me ngā kuia o tērā wā, ngā tino rangatira o Kahungunu i taua wā, koira āku Mahara, ērā koroua ērā kuia kua kore ināianei. Kua mahue iho ko mātou kua pupuri tonu i te here ki ngā iwi katoa ki ngā hunga whakaheke.”

I whakatūria te whare tuatahi i te tau tahi mano waru rau whitu tekau mā ono heoi i tupuheketia. I whakatūria te whare tīpuna turarua, heoi i kainga e te ahi i te tau tahi mano iwa rau tekau mā toru, heoi hei ngā rua tau i hanga whare anō.

Ki tā Jerry Hapuku, “Ēnei ngā tamariki mokopuna hoki kei te ora tonu a haere koutou mō tēnei te rā whakanui ko tēnei te whare.”

Ki te hau kainga nei, he mīharo rawa te eke ki tēnei o ngā rangi whakanui, ko te tūmanako, ka tū tonu tēnei whare tīpuna mō tētahi rau tau anō.