I whakatūwheratia te whakaaturanga o ngā tūpuna i tāngia e Lindauer ki Czech

Kua roa nei ngā iwi o Czech Republic e wawata ana kia whakaatuhia ngā kanohi Māori i tāngia e te ringa o Gottfried Lindauer. 

Nō te rā nei, oti ai tēnā hiahia o rātou i te whakatūwherahanga o te whakaaturanga o ngā mahi tā a Gottfried Lindauer ki Pilsen.

He rā nui tēnei mō te ope o Aotearoa konei nō te ata tonu nei hakaritahi ai ngā mātua i te taha o te koromatua o Pilsen ki te hōrōnui o tēnei taone. 

Nō muri mai ka tū mai ko te kapa o Ngāti Rānana ki te pokapū o tēnei taone whakangahau ai i te iwi kāinga nā nonaianei rā ko te whakatūwheratanga mārika i tēnei whakaaturanga o ngā tūpuna i tāngia e Gottfried Lindauer.

Nō te rā nei i kitea e te iwi o konei  te mana me te ihi o te Māori i tangia e tō rātou huanga. 

E ai ki a Patu Hohepa, “Me titiro tātou kei hea atu te mana o ngā mahi i whakarerea mai e o tātou tupuna.  Ko rātou e tare nei i runga i ngā pātū i haere ki tāwāhi āhua rite nei ki o tātou hoia i haere ki tāwāhi.  Engari ko rātou e mau kē mai ana i tō tātou Māoritianga i te mana hoki o ngā tūpuna kua mene atu ki te pō.”

Kahore i tū atu i ngā tini whanaunga o Ngāti Rānana hei whakangahau i te iwi kāinga i tēnei rā.

Hei tā Lewis Whaitiri, “He maha tonu ngā tūpuna o ngā kaihaka kei roto i a Ngāti Ranana e iri ana ki ngā pātū o te wāhi nei.  Nā reira he mīharo he māringanui nā mātou kia whai wā ki te haere mai ki te kite i o mātou tūpuna kātahi, ā, kia tae mai mō te kawe mate o Lindauer ka rua, me te kitekite anō hoki i ngā kanohi o o mātou kaumātua kua haere mai i te kāinga.”

Neke atu i te kotahi rau whitu tekau mano ngā tiamana i kitea tēnei whakaaturanga ki te taone nui o Berlin i mua noa atu o tēnei engari ki konei e rongo ana i te wairua o Gottfried Lindauer me te harikoa o te iwi kātahi anō ka kite i ngā mahi a tō rātou na uri.

E ai ki a Raiha Kerei, “Ka kōrero mai ki a mātou ka heke ngā roimata e aroha nā.  Ki au nei na ngā tūpuna tērā mahi he whakatangitangi i te iwi.  Nā, he tino kaupapa tēnei aini hei wānangatanga mā tātou o te kāinga.  Āe, āe kia tae ki te kāinga ka tino wānangangia ki taku mōhio.  Take ētahi kahore e mōhio kei konei mātou engari ka kite i runga i te pouaka whakaata.  Engari pai noa iho ahakoa kore kore i tae mai, ā, kua tae mai ngā kanohi o te kāinga."

Ehara tēnei i te mutunga o tēnei whakaaturanga engari ki konei whakaatuhia ai ngā tūpuna Māori mō ngā marama e whā.  Hei te Hepetema whakahokia rātou ki te Whare Toi o Tāmaki.  Hei reira whakaatuhia ai te whānuitanga atu o ngā tūpuna i tangia e te paraihe.