Inapo rā kapohia a Amster Reedy e te ringa kaha o aituā

He kaiwhakapūmau i ngā kawa o te marae, he pukenga, he tohunga, he kaumatua i arohanuitia, inapo rā kapohia a Amster Reedy e te ringa kaha o aituā.

E mōteatea ana a Te Aitanga a Mate me Uepohatu i tō rātou ihorei kua hoki atu ki tōna ūkaipo i Hiruharama, Ruatorea i tēnei ahiahi tonu.

I whānau mai a New Amsterdam Reedy i te tau 43 o tēra rau tau, tipu mai ai rātau ko ngā tamariki 17 o tōna whānau i tētahi pāmu kau pātata atu ki Ruatorea i te tai rawhiti, whaimurimai i ngā tau o te kura, ka tahuri atu ia ki te ara mātaraunga, hei huarahi māna.

He tangata i mōhio whānuitia mo tōna wairua paihere i te tangata ahakoa kōwai, ahakoa nōhea

He pāpā ki āna tamariki tokotoru, he hoa rangatira ki a Shirley, mahue mai ana hoki ko āna mokopuna, mokopuna tuarua hoki.

I tau atu te tūpapaku ki tōna marae o Hiruharama i tēnei ahiahia, ki reira takoto ai tae noa ki tōna nehunga ki Ruatorea tonu, hei te rā Horoi. E te kikopuku, e te amokapua, moe mai rā.