Interest in horse sports rising in Rotoiti

Kua ora mai anō te karapū o Rotoiti Lakes Hacks and Hunt na runga i te pikitanga o ngā mema ki roto i a rātou, ā, kua piki mai i te ono tekau ki te kotahi rau. Ko te kaupapa i pēnei ai rātou na runga i o rātou mahi whakawhanake i te hunga rangatahi.  Kei a Mere McLean ngā whakamahuki. 

Kei te āta hoki mai ngā whānau ki ngā ahuatanga o te eke hoiho ki te takiwa o Rotoiti.

Hei tā tētahi mema a George Haimona (Ngāti Pikiao, Te Arawa), “He karapū ā whānau tēnei, nō Te Arawa me kī, ka noho ki te taha moana o Te Rotoiti, he āhua rua tekau mā wha te pakeke o tēnei karapū, ā, i ōroko mai i te pūtake o te maunga o Matawhaura, ā, kei reira tonu mātou e whakaharatau ana i ngā mahi hoiho.”

Ko tā Te Karapū Hoiho o Rotoiti, ko te pikitanga o ngā mema ki tō rātou karapū he mea aro ki ngā kaupapa e tika ana mā ngā tamariki me ngā rangatahi.

“Well it's raining today, we haven't had any spills yet long as you ride sensibility and got the right gear and your saddles are tie and on properly you should have a problem,” hei tā Jamie Paringatai (Te Arawa).

“Kia ako ai wā tātau tamariki ki te eke hoiho ki ngā ahuatanga o te rēhi hoiho, ā, engari tuatahi he kaupapa tēnei e ako ana i ō tātau tamariki ki te pereke hoiho, ā, ki te whakatau i ō rātou ake hoiho me te eke anō rā,” hei tā Haimoan.

I tipu ake a Maakarini Nelson ki roto i tēnei karapū, ā, he whetu maiangi ia ki roto i tēnei huihuinga.

“Ko tōku mea pai ko ngā barrels i te mea ehara te mea me tōtika noa to haere me ka oma tere, huri rauna i ngā barrels tere rawa, ā, i tēnei rā, kua tae tuatoru me ngā flag me te tuatahi ki te ring and sword.”

Hei tērā marama ka whakahaere anō tēnei karapū i tētahi huihuinga pēnei ki Rotokawa.