Iwi of Origin, largest in its history

I karahuihui te tini me te mano ki te pokapū o Tāmaki Makaurau, he whakahiki mana te take i te hui nui o Iwi Of Origin. I tēnei tau kitea ai te tokomaha rawa o ngā tāngata nō tōna ōrokohanga. E whakapono ana ngā kaiwhakahaere ka kitea te nui rawa o ngā tāngata hei ngā tau kei te heke mai. 

Kīhai te ua i pāpare i ngā iwi i tae mai ki te whakatuatu i tō rātou hautoa ki te papa tākaro.

Hei tā Tākoha Ropati – Kaiwhakahaere, “Ki ōku nei whakaaro tata ki te kotahi mano rima rau i tēnei tau. Ko ētahi kēmu hau ko te Rīki nō reira maha ngā whānau haramai ki te tautoko i o rātou nei tāmariki i tēnei kēmu. Nō reira tino harikoa kua tae mai e maha ngā tīma mō te rīki.”

I tēnei tau kitea te tokomahatanga ake o ngā tāngata e huihui mai ana nō te orokohanga o te whakataetae e whitu tau ki muri. I te rangi nei karahui ai ngā tīma tekau ma rua neke atu nō ngā tōpito o te motu.

Ko tā Ropati, “Rima tekau tara anake ki te uru i tētahi tīma, nō reira kare koe e taea ki te whai tētahi whakataetae ki tēna momo utu. Engari ko te tūmanako ka haramai ngā whānau, ka haramai ngā marae ki te tautoko i te kaupapa ki te kite i a Ngāi Māori katoa e noho ana ki Tāmaki, nō reira koira te kaupapa."

Ko Tāmaki Makaurau te taone nui rawa mō tōna tokomaha, heoi ko tā Rōpati kāore te nuinga i mōhio ki tō rātou whakapapa. Nāreira te rā nei hei whakakotahi i a rātou i roto i te wairua Māori.

Hei tā Ropati, “He rā ki te pau hau, ki te tākaro i ēnei kēmu e tino manawa a ngāi Māori ki te tākaro, engari ko te mea nui ko te whanaungatanga.”

E whakapono ana a Ropati ka eke te kaupapa nei hei hui hākinakina nui rawa mō ngā iwi Māori puta noa i te motu.

“Kia mōhio ngā Māori katoa o Aotearoa ko tēnei te whakataetae, Iwi Of Origin, ko tēnei te Pā Wars e pirangi ai ngā iwi katoa te uru, ae ko tēna te manako mō ahau,” tā Ropati.