Iwi stage peaceful protest on Whanganui awa

Peaceful protest at Ōroua River

Kua hōhā katoa te iwi o Aorangi a Ngāti Kauwhata i te korenga o te kāwanatanga ā-rohe e ohorere i te paru o tō rātou awa tipuna a Ōroua.

E ai ki tētahi kaumātua, mai anō i tōna kōhungahungatanga te awa e noho rāhui ana nā runga i te kaha paru, ā, e mea ana tētahi kaipūtaiao me ngana te kāwanatanga ā-rohe ki te whai rautaki e tiakina ai ngā awa.

He ataahua ki te kanohi, engari anō a raro i te wai. Tata ki te kotahi rautau te awa o Ōroua ki te taone paku o Aorangi, e noho ana hei kainga mō te para.

Ahakoa he taiohi tonu, he toa takitini rātou. Huhua ana ngā kaiporotēhi e whakaatu ana i ō rātou āwangawanga mō te kino o te paru o te awa.

Kaore te koromatua o Aorangi a Margaret Kouvelis i watea ki te kōrero ā-kāmera mai ki a Te Kāea i te rā nei, kāore hoki ia i whakaae ki te tono kia haere ia ki te hui ki te awa o Ōroua hoki, heoi i whakaputa ia i tēnei reta e mea ana "Kua wātea te awa hei kauhoetanga, heoi mehemea he paru te āhua kaua e kauhoe."

Kei te noho āwangawanga te iwi.

E ai ki a Corina Jordan tētahi kaipūtaiao, ko Ōroua tētahi o ngā awa paruparu rawa atu o te takiwā nei.

Ko tā te koromatua anō i roto i tāna reta, "Mehemea he haunga ana te awa, a, ka taea e koe te kite i ētahi paru pango i runga i ngā toka, kaua e uru atu."

E ai ki a Corina, he karere whakarangirua tēnei ki te haukāinga.

He nui ngā mahi kei mua i te aroaro ki te whakarauora i te awa, heoi e whakapono ana a Ngāti Kauwhata me te kaipūtaiao a Corina Jordan ka tutuki.