Jackson names favourites as Te Mātāwai replacement

Kua tūtohu ake a Willie Jackson ko wai mā hei whakakī i te tūranga ka mahue ake i a ia i te poari o Te Mātāwai. Kua heke kē a Jackson i ana tūranga pāpāho reo irirangi e rua, whai muri i tana whakapuaki ake ka whakataetae ia mō te rārangi kapa o te Rōpū Reipa, ā, hei ēnei wiki tata ka heke anō ia i tōna tūranga Te Mātāwai. 

Ahakoa kāore anō a Jackson kia heke iho, kei a ia ngāna ake kōwhiringa

“E mōhio tātou a Hēmi Dale, he tangata tino pai, kei te noho ia i roto i tā mātou hapori, pai ana tana mahi i tēnei wā, ā tērā wiki ka kōrero au ki a ia.  Me te kōtiro a Tuku, pai ana tērā Reikura, rawe te mahi a Reikura.”

Neke atu i te kotahi rau whā tekau ma rua mano ngā tāngata Māori e noho ana ki Tāmaki Makaurau, ā, e ai ki a mātanga mātauranga Te Kepa Stirling he tūranga nui tēnei hei kōkiri.

“Kia mōhio ki ngā āhuatanga ki ngā ture Māori o tēnā iwi o tēnā iwi o tēnā iwi.  Te kore hoki e mōhio ki tērā ka whakaitia kē te āhuatanga o te mana motuhake Māori mō tērā takiwā.”

Nō tērā tau i kōwhiria tuatahi ai a Jackson ki te Te Mātāwai e te Uepu mā ngāi Māori e noho taone ana o te motu.

Hei tā te Hemana Tuarua o Te Mātāwai a Waihoroi Shortland, “Kei runga i tēnei tūranga kei te hiahia o te motu, kia rauora anō tōna reo.  Kia tāea e tātou te kimi ētehi atu huarahi kāhore i te mōhiotia ināianei hei whakaora i taua reo, hei hiki i tāua reo ki ētehi atu taumata koirā te momo tangata me haere mai ki te Mātāwai.”   

Tokowhā ngā mema o te Uepu mā ngā iwi Māori noho taone o te motu ka kowhiria hei te wehengarua o te tau.