Ko te kamupene keri hinu o Statoil i whai mana, kia rangahautia ngā whenua me ngā moana o Te Reinga - Te Tai Tokerau.
Engari ahakoa kahore te mana katiaki o Te Rarawa e whakaae ki enei mahi keri hinu, e hiahia ana rātou kia tū he rōpū hei aruaru haere i ngā mahi rangahau a te kamupene nei.
Hei tā Haami Piripi o Te Rūnanga o Te Rarawa, “Kua rongo ki a rātou nei mahi ki tawahi engari he rongo noa iho, ko te tikanga me rapuhia he kōrero, rangahaua, kimihia kia mārama pai mātou he aha te aha.”
Nā te kamupene o Statoil te tono, na te kāwanatanga i whakaae, ā, kua tae mai te wā mō ngā katiaki ki te rapu mōhiotanga, he mōhiotanga tika nei.
Hei tāna anō, “Mena ka kōrero mai te kamupene nei me pēnei me pēraā, ko wai te mea e tino whakapono ana ki a rātou nei kōrero, mēna ka kōrero mai te Kāwanatanga me a rātou nei kōrero.
Kāore noa au e tino whakapono ana ki tō tātou kāwanatanga mō taua take rā. Nā, kei hea te kōrero pono, kei hea te kōrero tūturu, māku e mea atu kei ngā kaitiaki.”
Ko te tūmanako a Te Rūnanga o Te Rarawa ka tautoko mai ngā iwi katoa o te Tai Tokerau i tā rātou e hiahia ana, engari tērā anō ngā whakaaro a ētahi, mō ngā hua, ngā korehua ranei, ka taka mai ki ngā iwi whānui.
Otirā, ki te hui whakanui o Waitangi ka whakatakotohia te tono a Te Rūnanga o Te Rarawa ki mua i te aroaro o te Kāwanatanga, kia tū rangatira tā rātou rōpū motuhake rangahau, kia puta ai te iwi ki te māramatanga.
