Ka aukatia pea te Kura Pakihi Māori ki Te Whare Wānanga o Wikitōria

E whitu ngā wāhanga ako i te Kura Pakihi o Te Whare Wānanga o Wikitōria i Poneke, e whakaarohia ana kia kati ōna kuaha, ākene pea tokorua ngā kaiako Māori ka whakamutua.  E whā ngā tino tohu pakihi ka ngaro i tēnei aukatinga, ā, ko te āwangawanga me ahu pēhea ināianei te maha o ngā tauira Māori e whai ana i ngā tohu pakihi nei.

Hei tā Paul Meredith, “He mea pāpouri, otirā ko te mea he whakaaro tēnei na ngā tumuaki o te Whare Wānanga me kāti, otirā he whakaaro i tēnei wā.  Ko te mate rā ko te tokoiti o ngā tauira e whai ana i tēnei akoranga.

E ai ki ngā kōrero nā te iti iho o ngā tauira me te mimiti o te puna pūtea, koinei te take ka katia ēnei wāhanga ako e te Kaihautū Matua.  Engari hei tā Paul Meredith, kei te piki kē te rahi o ngā tauira Māori kei te aro mai ki tēnei wānanga.

Hei tā Meredith anō, “Ahakoa kei te piki ake te nama o ngā Māori kei roto i tēnei wāhanga o te Whare Wānanga, kei te heke iho te nama i roto i taua akoranga te ao Māori me te ao Pakihi.”

E whā ngā tohu Pakihi Māori ka ngaro i tēnei katinga, he Tohu Paetahi Pakihi me te Tauhokohoko, te Tiwhikete me ngā Tohu Pokairua.  Nā reira, kei hea te huarahi hei anga whakamua mō ngā tauira kei reira ināianei?

E mea ana a Meredith, “Ka noho i roto i taua wāhanga, ko te tūmanako ka whai huarahi kē hei ako i taua tūmomo āhuatanga te Ao Māori me te Ao Pakihi, waiho mā taua wāhanga e whakarite he aha ngā huarahi kē ma ēnei tūmomo tauira.

Otirā, hei te marama e heke mai nei, ka tūtaki anō te Poari Pū Mātauranga o te Whare Wānanga o Wikitōria ki te whiriwhiri anō, ka mate ka mate, ka ora ka ora rānei te Kura Pakihi Māori.