Ka haere a Tūhoe ki Pōneke ki te whakakaha tā rātou hononga ki ngā Pirihimana

Kei te whakakaha te hononga i waenga i a Tūhoe me ngā Pirihimana koira i tūtaki ā- kanohi ai rātou ki Te Whanganui a Tara. Kua tae atu ētahi o ngā tamariki i pangia i ngā urutomo i Ruatoki e whitu tau ki muri.

Kikī te rā i ngā mahi harikoa mō ēnei tamariki nō Ruatoki.

Engari e whitu tau ki muri, ehara i te pai mō ētahi o ngā tamariki nei, i tutakitaki ki ngā Pirihimana, he tino rerekē te āhua.

Hei tā Moko Hillman, “I tērā wā, he roimata mamae, ngā roimata me ngā hupe i heke. Inaianei, te haramai ana ki konei, te tūtaki ana rātou kia pai ai te honohono i ngā mahi, kia whakaotihia i raro i te pai, i raro i te oranga, i raro hoki i te rangimarie.”

I urutomo ngā Pirihimana i te whare o Awhitia Kohu me tana hoa, a Moko Hillman. I reira o raua tamariki, ā kei te noho tūpato rātou i ngā Pirihimana, he tūkinotia nō rātou anō nei he kararehe.

Ki tā Hillman, “Kua kore hiahia haere ki waho nā te mea kitea mai rātou o rātou hoa, he kōrerohia, he pēnei rātou, he tumatumahia tō rātou kainga, he terrorist rātou.”

Engari e ai ki a Hillman, kua kite ngā tamariki i te taha rerekē o ngā Pirihimana. Nā whai anō, ka piri tata ngā rōpū e rua. Ā, ka whakāro ētahi o ngā tamariki mō ngā rā ki tuā hei Pirihimana a tōna wā.

Hei tā Maui Te Kira, “He mea whakaaro ki tērā mahi, me whakaaro ki te future nē. He pai ngā pirihimana ki te ako i ngā tamariki i te rori, me te inuwaipiro i te motoka, me ngā māmā, me ngā pāpā.”

E kore ngā mamae o mua e mahu i te haerenga kotahi noa, kāti ko te hiahia a te Toihau ka tae atu anō ia ki Ruatoki hei te Hereturikōka, kotahi tau whai muri mai i tana tuku whakapāha ki te hapori, ki te whakakaha i te hononga ki a Tūhoe.