Ko te tīmatatanga a te kapa Tuatara o Tāmaki Makaurau ki roto i te whakataetae Australian Baseball League i uaua tonu inapō, kaua i te hinganga i a Canberra Cavalry anahe, engari i te whakawhiunga o tā rātou kaiwhakahaere, a Steve Mintz, i panaia, i te pāeke tuaono.
Ko te hinganga e 7-5 te hinganga tuawaru a ngā Tuatara, e noho atu ana ki te takere o te wāhanga Northeast. Atu i te pā hākinakina o QBE ki Ōkahukura, i noho kia toru ki te kore ngā tatauranga i te mutunga o te pāeke tuatahi, ka whai piro a Cavalry i te hahaunga nā Zach Wilson kia kotahi atu ia ki uta. Ā, i puta whakamua atu anō ai rātou i te pāeke i whai atu, i te hahau nā Jerrick Suiter, ā he tokorua kē i kotahi atu ki uta.
Ko te taha tukituki kua tino whakararu nei i te kapa hau kāinga i tēnei tau tākaro, ā i pērā tonu. Nā konā i noho piro kore ai rātou tae noa atu ki te pāeke tuawhā, kātahi a Won Seok-Kim ka tukuna kia hīkoi, ā i ahu atu ia ki te pae tuarua i tā Te Wera Bishop tuki paoro ki te tumu o te rākau. Ka ū atu a Kim ki uta i tētahi rerenga paoro nā Jonny Hozma, ka ū atu hoki a Bishop i tā Kent Blackstone hahau kotahi ki te taha mauī o te papa tākaro. E rua hoki ngā ūnga i hua ake i te hahau kotahi nā Jared Walker ki te taha matau i mua i te mutunga o te pāeke.
Nā konā, i 5-4 ngā tatau, ko ngā Tuatara i mua, heoi i hē haere ngā piropiro o te hau kāinga i ngā whakatau haupatu a te kaiwhakawā pae uta, a Josh Weschler. Rere ana ngā whiu kōrero a te pou tūtata, a Josh Morgan ki a Weschler i te paunga o te pāeke tuaono, ka panaia, ā i te aranga ake o Mintz ki te āwhina, i panaia hoki a ia.
I hē kē atu mō ngā Tuatara i te ekenga a te tira Cavalry ki te whakaōrite i ngā tatau kia 5 ki te 5, nā tētahi rerenga paoro i a Suiter. Kātahi a Tucker Nathans ka hahau atu i te paoro ki tua o te taiapa, kia rua ngā omanga ki uta i te pāeke tuawhitu, kia puta whakamua ai te ihu o ngā manuhiri.
Ā, i te hokinga atu o ngā Tuatara ki te patu, kaare he omanga i hua ake. Ka tūtaki anō ngā taha e rua i te tuarua o ā rātou tākaro e whā ki QBE Stadium hei te pō nei.
