He whakatā te hiahia nui o King, heoi he whakataetae anō tāna hei te tauhou.
Nō te ata nei tae mai te waewae kai kapua o Ngāti Porou ki te kainga. I whakahōkia mai e ia i te tāonga Hong Kong Open, tōna wikitōria kaitā tuatahi PSA. Koia te kaitākaro nō Aotearoa tuatahi i ngā tau 15 kia angitu i tētahi whakataetae poipātu kaitā mai i a Carol Evans i te whakataetae Tournament of Champions.
E hikaka ana a King ki te whakatā ki tōna kainga i Kēmureti me ōna hoa me tōna whānau, ki tātāhi anō hoki. Heoi ēhara i te mea he whakatā noa iho, hei te Kohitātea whakataetae anō ia ki te Tournament of Champions ki te Āporo Nui, ā ka whakaharatau tonu ia, hei tāna nā tōna wikitōria i Hong Kong ia e rikarika ana ia.
He whakataetae kua waru tau ia e whai ana, hei tāna anō he mea pai ki te eke ki tērā taumata. I whakakao atu ngā kaitakaro 24 toa o te ao ki Hong Kong, ā hei tāna kāore i kō atu i te ekenga ki te pae o angitu i taua āhuatanga.
Kātahi te tau nui ko tēnei mō King. Koia te kaipara anake i whakataetae ia rangi o ngā taumāhekeheke hoawhenua, ā e rua ōna mētara kōura, kōtahi tōna mētara rauwhero. Inā ngā whiringa toa puta noa i te ao ōna, i toa ia i Cleveland i te Hui-Tānguru. I tūraki e ia i te kaitākaro tuatahi o te ao i Hong Kong, i a Raneem El Weilly, kua toru ōna wikitōria karapīpiti ki te kaitākaro o Ihipā. Kua noho ia ki te taumata o Leilani Rorani, Kahurangi Susan Devoy me Evans hei toa nō Aotearoa i Hong Kong.
Nō te Pōhoroi nei i whakawhiwhia e rāua ko Amanda Landers-Murphy (Te Ati Awa, Taranaki) te tohu Ika a Whiro mo te kapa Māori toa o te tau, i te pō tuku tāonga hākinakina Māori. Hei tā King, he mea harikoa taua pō rā te kite i te rahi o ngā kaipara wahine Māori e eke ana i ō rātou momo hākinakina, e harikoa hoki ana ia i riro i ā raua te tohu rā.
Ka paku whakatā a King inaianei, hei te tauhou timata anō ngā mahi ki te Āporo Nui hei te Kohitātea, me te whakataetae ipu o te Ao ki Chicago hei te Hui Tānguru.
