Ka hui te Minita Tiriti me te iwi o Ngāpuhi i mua i te hikinga o te Whare

Ao ake i te whakatatūnga o ngā kerēme o Tūhoe, i Te Tai Tokerau te Minita Take Tiriti a Chris Finlayson kia huitahi ki te poari me ngā māngai-ā-hapū o te rōpū Tūhoronuku.

E mea ana te minita, he nui rawa te whakatatūtanga o Ngāpuhi kia kore ia e tae mai i mua atu i te hikinga o te Pāremata.

“Kia ora ai a tātou mokopuna a ngā tau kei te haere mai nā te mea inā kore tātou e hīkoi i tētahi hīkoi hei oranga mō Ngāpuhi kua kore e oti.  Nā, kia mutu tātou i tēnei mahi me haere tahi tātou.”

Kahore hoki te minita e rata ana ki te tono kia wehe mai a Ngāti Hine ki te whai i tōna ake whakatatūtanga.

Hei tā Sonny Tau, “A Ngāpuhi kotahi noa iho ana whakataunga kerēme.  Horekau kē ia e titiro atu ana ki ētahi atu e pahupahu ana i te taha.  Tuarua iho, ka mea mai ki a mātou kia totoro atu ngā ringa ki a rātou e noho tonu ana ki waho o te tēneti kia hou mai rātou ki roto.”

He hui tēnei e whai wāhi ai ngā reo, ngā hapū kua tohua ki raro i ngā whakahaere o Tūhoronuku te rongo ki te mahere e taea ai rātou ki te pae tawhiti. 

Engari e tāria ana kia puta te whakahau a te Taraipiunara o Waitangi pena ka noho ohorere ia ki te whakawā i ngā nawe e pā ana ki tēnei whakahaere.

Heoi anō, hei muri i te kōwhiringa pōti mōhiotia ai mēna konei tonu te tangata hei kōrero mō ngā take tiriti.