I ngā kōrero mō ngā mahi patipati a te Kāwanatanga i ngā pakihi keri nunui o te ao e puta tonu mai ana.
Kei te whakahē tonu ngā iwi pēnei i a Te Rarawa i te Tai Tokerau, i ngā mahi rangahau e takatū mai ana i o rātau rohe. I tēnei ata tutū ai te puehu i te tuatoru o ngā hui kua karangahia e Te Rarawa me Statoil i Kaitaia.
Kua puta mai ētahi whika anō mō ngā pūtea tāke e rua rau toru tekau mā whitu mano i pau i te Minita Take Ahu Pūngao a Simon Bridges hei utu i te nohonga a ngā rangatira 11 o ngā kamupene kēri mō ngā rā e wha i te wā o te Kapu Whutupōro o Te Ao.
He whitu mano rua rau mō tētahi haerenga inu waina, he toru tekau mā whitu mano mō ngā pō e whā ki te hōtēra o te Intercontinental ki Pōneke.
Heoi he take nui kaua mo te pāti Kākāriki anake, engari mō ētahi o ngā iwi i te Tai Tokerau hoki. I tēnei ata rū ai te whenua i te hui i karangahia e Te Rarawa, me tētahi o aua kamupene i mirimirihia e tō tatau Kāwanatanga i te wā o te Kapu o te Ao, a Statoil.
Tē taea te karo i te mahere a te Kāwanatanga e whakatuwhera mārika ana i ngā kuaha o te taiao o konei ki ngā kamupene kēri nunui, te whakahau a Haami. Nāreira hei tāna anō, me noho tata a Te Rarawa ki a rātau kia mōhio ai ō rātau hiahia mō te taiao. Heoi e ai ki tētahi atu pekanga o te nōta, kei te hē tēra whakatatanga āna, he mahi mitimiti tou noa.
Ka ono tau a Statoil e āta rangahau ana i te rohe.
Hei taua wā tonu ko Te Rarawa hoki tēna ka kanohi hōmiromiro atu ki a rātau.
