E tū ana te whakataetae tēnehi e kīa nei ko Waikato-Bays ki Kirikiriroa, ā, ahakoa tōna ingoa, he tauwhāinga tēnei e tōpū mai ai ngā kaitākaro tēnehi kei raro iho i te tekau mā waru tau o te ao. I tūtaki atu a Te Kāea ki tētahi o ngā kaitākaro tamariki rawa. He kōhine Māori nō Te Arawa.
Ahakoa tōna taitamariki, e tino rangona ana te wairua pūkākā o Tiana Windbuchler, he tekau mā toru noa te pakeke.
He kanohi hōu ia i tēnei momo tauwhāinga, engari kua turaki ia i ētahi kōtiro pakeke ake i a ia.
Nā tōna pūkeke i roto i ngā tau, kua eke ia ki ngā taumata pērā i ērā kua ekea kē e ōna hoatākaro pakeke ake i a ia.
Pēnei i te āhua titikaha o te mātua, kua parea e tōna pāpā āna mahi o te wiki ki rahaki, e whai wāhi atu ai ki tō tana tamāhine taha, ā, e noho whakahīhī ana ia.
Kua rima tau a ia e whai ana i te ao tēnehi, me te aha, mā ngā tohutohu a ōna mātau, tōna kaiako hoki e whanake ai ia, ā, haere ake nei.
E mōhio ana ia, koinei te tino hākinakina ka whāia tonutia e ia, ā, arā hoki ngā tōmina kei te pae tata, kei te pae tawhiti hoki.
He huhua tonu ngā tau kei mua i a ia, ā, tērā pea ka kite tātau i te puāwaitanga mai o tētahi kaitākaro tēnehi taumata rau Māori.
