Ka pīra atu ngā hāmenetanga i ūhia ki runga ki a Teina Pora

Kei ngā rangi tūhāhā te wairua hari o Teina Pora, nā runga i te mōhio ka pīra atu ōna hāmene mō te kōhuru me te pāwhera o Susan Burdett ki tōna kāinga ki te tonga o Tāmaki Makaurau he rua tekau tau neke atu ki muri.

Ka tau atu tāna tono pīra ki te Kaunihera Motuhake o te Kuini ki Rānana.

I hāmenetia tuatahitia a Teina Pora i te tau 1994, whai muri i tana whakaae nāna i pāwhera, i kōhuru i a Susan Burdett, hēoi, nā te putanga mai o ngā taunakitanga DNA e hono ana i a Malcolm Rewa, ka whakawāngia anō a Pora i te tau 2000. Hēoi, ko taua hāmene tonu rā i ūhia. Inaianei kua whai oranga tonu ia.

O ngā tono pīra e rima, e rua noa iho ka rangona e te Kaunihera Motuhake o te Kuini, ā, ko te tuatahi, he horihori tāna i whākī ai ki ngā pirihimana, i hē hoki te āhua i mau ai tēnā whākina i ngā pirihimana, otirā, ngā āhuatanga katoa e pā ana ki taua mea.

Ka rua, he taunakitanga kāre i rangona i tāna whakawātanga. He taunakitanga i toko ake ai te whakaaro kāore a Malcolm Rewa mō te whakaae kia piri tētahi atu ki tōna taha ka mahi pāwhera ana ia.

I puta ngā korero whāki a Pora whai muri i ngā uiuiranga a ngā pirihimana e whā ngā rā te roa, ā, kāore hoki ōna rōia.

Nō te taengamai a te kaiwhakatewhatewha a Tim Mckinnel ki te titiro ki te kēhi, ka whai takenga anō te take nei, nā konā, kua whakaritea e te Kaunihera Motuhake o te Kuini kia whakapāhohia arorangitia te take nei mai i Rānana.

Ka whakaarohia e te komiti ā ture a te kaunihera motuhake a te kuini mēnā rā ka taea e rātau te rongo ki ēnei taunakitanga hōu, mēnā rānei hoki i hua ake he hapa ā ture.

E matapaetia ana ka tū tēnei whakawātanga hei tēnei Whiringa-ā-nuku.