Ka tae atu a ngāi manomano mā ki te Whakataetae Pā Whutupōro o Whakatāne

Hei tēnei Rāmere, Rāhoroi hoki tū ai te Whakataetae Pā Whutupōro o Whakatāne ki te papa tākaro o Rex Morpeth.

Koinei te tauwhāinga karapu nui rawa i Aotearoa, ā, i tēnei tau neke atu i te whitu tekau ngā tīma kua rēhita, kotahi mano ngā kaitākaro i ngā reanga e ono.  Ka tākarohia ngā kēmu ki runga i ngā whīra tekau mā waru.

Ko te wāhanga e kiia nei ko te 'drop off' tērā ka tū a te Rāmere, ā, hei te Rāhoroi, 10am, timata mai anō ai ngā kēmu tae noa ki te takiwā o te 6pm.

Ko tētahi o ngā tino wāhanga o tēnei huihuinga, ko te taenga mai o ngā tino kaitākaro o Aotearoa, arā ngā kaitākaro Opango o mua.

I ngā tau kua hori, ko ngā momo pēnei i a Tama Umaga, Carlos Spencer rātau ko Piri Weepu ētahi kua tae ā tinana atu ki te tākato mā te tira rongonui, arā, ngā Baa Baaz.  Kāre ngā tāngata i te whakamā kia pātau atu ki a rātau mō ā rātau waitohu, kia tango whakaahua hoki rātau ki te taha o ēnei whetū. 

Kua roa nei tēnei tira e tae mai ana ki Whakatāne nei, me te aha, ko ētahi o ngā kaitākaro o roto nō Aotearoa, nō tāwāhi hoki.

Ka tae atu tā mātau karere a Tamati Tiananga ki Whakatāne, ā, māna ngā aupiki me ngā auheke o te tauwhāinga nei e whakaatu atu ki a koutou hei tēnei mutunga wiki.