Ka titiro ngā kaiwhakahaere pākihi Māori ki ngā tūmahi i Hāpanihi whenua

Ko ngā whakanuitanga rima tekau tau o Hingapo tētahi kaupapa matua kei te pae o te Pirimia a John Key, hei whakamana i te taurahere whanaunga ki waenga i ngā whenua e rua.

Kua tae atu te tira pākihi Māori ki Hāpani, hēoi ko te whainga matua kia whai mōhiotanga ai ki ngā hiahia a ngā kaihokohoko i reira.

E ai ki te Heamana o Te Awanui Huka Pak a Neil Te Kani, ka tāea e te Māori te kite i ōna Huakiwi i reira, ano hoki he mananui ngā mahi ki o rātou ake whenua.

He haerenga roa, engari ehara i te mea he aha ki ēnei ahumahi huakiwi.

Kua hiki te taumaha i a rātou, otirā kua whakaihu waka rātou i te ahumahi huakiwi.

Hēoi mō Pita Tipene, ko te whai mōhiotanga mō ngā makete i kōnei tōna aronga nui.

Hei tā Tipene, “Ka tae mai ki kōnei, he tau hou kē ahau ki te hoko rawa. Me tika rā me haramai au ki te tiro tiro pēhea te āhua o ngā iwi o kōnei. He tau hou kē ngā tāngata pēnei i ahau ki ngā āhuatanga o tāwāhi. Ko o mātou tūpuna he iwi kaha ki te haere ki ngā kokonga o te ao ki te hoko rawa, nā reira e tika ana me haramai au ki te tirotiro pehea ana te ahua o nga iwi o kōnei.”

Kua roa nei ngā iwi o Tauranga Moana e para ana i te huarahi ki ngā kuaha o ngā mākete ki Āhia.

E ai ki a Pouroto Ngaropo, “Nā tērā tauiratanga i whakaatu mai te mana motuhake o te ao Māori i roto i ngā mahi whakatipu rākau kiwi. Ehara i te mea ko te whenua noa iho hei whakatipu i ngā rākau hua kiwi noa iho, engari ki tā te Māori he mana tō te whenua, he mauri to te whenua nē.”

Ā he Wairua whakataetae pea i waenga i te Māori ki te hokona atu i wa rātou hua ki te marea nei.

Ki tā Pita Tipene, “Ko tā mātou pāmu ko Te Ahuareka, nā reira e tino mōhio ana ahau he reka kē atu ngā huakiwi o Te Tai Tokerau i ngā hua o ētahi atu iwi kē.”

Hei te wiki nei ka tāea e te Māori te whakaatu atu i wa rātou hua i kōnei.