Ko ia te mutunga mai o ngā mōrehu o Kamupene A o Te Rōpu Māori Rua Tekau Mā Waru. Ko Charlie Petera o Ngāti Kurī tērā kua tohua hei kai-whakaruruhau i Te Wānanga o Kamupene A whai muri i te matenga o Sol Te Whata i ngā wiki tata nei.
Kua whakanohohia tēnei morehu hoia o Ngati Kuri ki te tūranga kaiwhakaruruhau mo te kura motuhake o kamupene A. He turanga kua noho wātea mai i te matenga o Sol Te Whata i ngā wiki tata nei.
Hei tā te poutokomanawa hou, a Charlie Petera, ”Na hanga mokemoke nei i tēnei rā i taku mōhio he nui rawa ngā hū o taku hoa mōku engari heoi anō ko ahau anake e toe ana iaianei nareira heoi anō e mea ana te kōrero a Ngati Kuri, me whēke.”
E maua nei e ngā tauira o tēnei kura ngā tohutohu whakamutunga a Himi Henare ki te rua tekau waru kia tū Māori ai rātou kia tū rangatira.
Ko Charlie Petera tēra e mea ana, “Me hari kē te tangata ki te rongo atu i tō tāua reo me te rongo atu i ngā kōrero na te pakeke kē ēra kōrero engari māmā noa iho te tangi o o rātou reo i roto i ngā mihi katoa kia tātou, ā, he hōnore nui tēnei kua utaina mai ki runga i au.”
Hei tā tēnei morehu, ehara tana turanga hou i te mahinui na te mea e āwhinangia ana ia e ngā taitamariki o tētahi kura motuhake
E ai ki a Charlie Petera, “Ko o rātou kaha e utaina mai hoki i runga i ōku nei pokowhiwhi ngoikore hei whakakaha i au, ana kei reira kē ngā mahi nunui, kei a rātou kei runga i o rātou pokowhiwhi hei mau tonu i te wairua o te rua tekau ma waru.”
