Ka 279 rangi te kaiwhakatutū puehu Māori nei i rō herehere mō ngā hāmene mau pū te take, ka tukua ana ia i te whare herehere hei te rua wiki.
He aroha rerekē nei e kare ana ā roto o te tama nei a Tame Iti i te rā o Hato Waretini nei. He oranga ngākau mō tōna pāpā, hei te rua wiki ka puta i te whare herehere o Waikeria.
Ko tā Toi Iti, “kei te hari katoa te whānau ki te hokinga o tā rātou pāpā ki te kāinga.”
Nā Tame tētahi tīhau i te ahiahi nei e whakappuaki ana ki te aō i te puta atu i a i te whare herehere, ao ake i tana nohonga ki mua i te poari tuku here i te rā nei. Ko te whakatau, hei te 27 o tēnei marama, ka puta ia i raro i ngā tikanga utu here. Ā, ko te hui nui a tōna iwi hei Te Aranga kei tōna aroaro.
Ka puta ana ia, ka ea i a Iti te waru marama o te rua me te hāwhe tau ki Waikaeria i whakawhiua ki a ia me Te Rangikaiwhiria Kemara i te Haratua o tērā tau, mō ētahi hara mau pū. He otinga tērā o te whakawātanga mautohe rawa o Aotearoa, e ai ki te tini.
Kei te Kōti Tiketike te tono a ngā roia o Tame hei muru i tana whiu me āna hara. Heoi, he take tērā mō tētahi rā anō. Ko te rā o Hato Waretini tēnei i tutuki ai tana hiahia tuatahi, kia aroha atu te poari tuku here ki a ia.
