Ka turaki ngā Black Caps i a Ingarangi, kia toa ai te whakamātautau tuatahi

He tīmatanga pai mā te kapa Black Caps i tēnei raumati i tā rātou turaki i a Ingarangi nā ngā omanga e 65 i te Bay Oval ki Mauao.

Kotahi noa te whai a te kapa hau kāinga i te tīmatanga o te rangi whakamutunga, kia riro i a rātou ngā toenga wīkiti e whitu a Ingarangi i runga anō i te mōhio, i tino waia haere ngā kaiepa ki te āhua o te papa. Ko Neil Wagner i eke ki te taumata haukerekere, e rima āna wīkiti mō ngā omanga e 44, tē pau te hau i āna mahi.  

Ko Joe Denly tōna ika i te ati, he karo nā Denly i te tūpana nui o tana paoro, ka pā ki te komoringa, ā ka rere kia hopukia e BJ Watling. I mua atu, nā Colin de Grandhomme te kāpene o Ingarangi, a Joe Root i turaki i tētahi hopunga māmā nā Tom Latham.

Kātahi a Tim Southee ka whakahinga i te tangata mōrearea nei, a Ben Stokes i tētahi epanga nui, tōtika atu ki ngā pūtimutimu. 

Atu i reira, i pukumahi a Wagner ki te whakahinga i ngā toenga kaipatu e whā, ko Ollie Pope i hinga i tētahi hopunga mīharo nā Mitchell Santner. Ko Jos Buttler i waiho kia hipa tētahi epanga hōu a Wagner i a ia, he wīkiti whawhati te otinga. 

Ko te tauwhāinga i waenga i a Jofra Archer rāua ko Sam Curran i eke ki te 59 ngā omanga, ā ahakoa te maia, kaare i tino hua ake a Ingarangi, he epa iti i hahaua e Archer ki ngā ringa o Aotearoa, kātahi a Stuart Broad ka hinga i tōna waewae ārai wīkiti hei whakamutu i te tākaro. 

Kātahi te toahanga matawhānui, ko tēnei nā ngā Black Caps i te wā kāinga. Kotahi noa iho te wā ki a rātou hei patu, te toa hoki o ngā omanga kotahi rau e rua nā BJ Watling, ā te kaha hoki o te tautoko a Santner, i eke tuatahi atu ki te kotahi rau ngā omanga i tētahi tākaro whakamātautau.

Ko te whakamātautau tuarua ka tū hei te Rāmere ki te papa tākaro o Seddon, i Kirikiriroa. 

NZ ki a Ingarangi, whakamātautau tuatahi, rā tuarima:

Huringa tuatahi ki a Ingarangi: 353 hinga katoa (B Stokes 91, J Denly 74, T Southee 4-88)

Huringa tuarua: 197 hinga katoa (N Wagner 5-44, M Santner 3-53)

Huringa tuatahi ki a NZ: 615/9 ka kapi (B Watling 205, M Santner 126)

Otinga: Nā NZ i toa mā te huringa kotahi me ngā omanga e 65