He mema o te Pāremata Saami Iwi Taketake kua tūtaki atu ki tētahi rōpu Māori nō Te Taitokerau, e kawe ana i ngā whakahē mō ngā mahi keri kōhinu i te riu o Te Reinga.
Ko te mema o te Rūnanga Pāremata Saami, ko Henrik Olsen me te Kai-tohutohu Tōrangapū, a Runar Myrnes Balto ētahi o ngā māngai Saami i huitahi me te tira haere i tēnei wiki.
Hei tā Hinekaa Mako, "i pai te hui, ā nā te mārama o ngā tāngata whenua o Norway ki ō mātou mānukanuka, kei te whai whakaaro rātou ki ētahi ara hei tautoko i a mātou anamata noa."
I haere ngā māngai Māori ki Norway ki te kawe tōtika i ā rātou kōrero ki ngā tari matua o Statoil, he whakahē i ngā mahi hōpara e whakaritea ana ki tō rātou rohe moana.
Kei roto i tēnei tira, ko te kai-tiaki taiao nei, ko Mike Smith, ko te kaumātua nei, ko Sonny Otene me Hinekaa Mako, ā kua haria ētahi reta whakahē a Ngāti Kurī, a Ngāti Kahu me Te Rarawa.
Hei tā Mako, " i whakamaioha te Pāremata Saami ki tēnei haerenga a tā mātou tira ki te whakamihi i te tautoko i torona atu e te Perehetini o Sámediggi i tērā tau. Ko ō rātou māharahara i tērā wā i puta anō, arā ko te whakaaetanga kore here, o mua, mārama hoki a ngā Māori o Te Taitokerau, kāre i tukua ki a Statoil."
I tēnei wā, e haere ana te tira ki te taone matua mō te mahi kōhinu i Norway, arā ki Stavenger, te wāhi e tū nei ngā tari matua o te kamupene Statoil. Ko te whai i reira, he whakatau atu ki ngā kai-whakahaere o Statoil, kāre ō rātou kaipuke e hiahiatia ana ki ngā tai o Aotearoa.
Hei tā Hinekaa Mako anō, he haerenga tēnei e kawe ana i ngā tūmanako "e whai nei kia tū ai tētahi hononga tōrangapū, hononga tika, hononga ture hoki e mahitahi ai ki ngā tangata whenua o Norway."
