Ka whawhai te Maunga Whakahī o Rongomaiwahine, a Shane Cameron ki a Kali Meehan mō te taitara WBA reanga taumaha hei te marama o Whiringa ā Rangi.
I whākī tuatahi mai te toa reanga taumaha ō-mua o Aotearoa i tana hiahia hoki ki te whawhai ki a Te Kāea i tērā wiki. Ināianei kua kōrero mai ia mō te ara kei mua i tōna aroaro, e eke anō ai a ia ki te papa mekemeke.
Hei tā Shane Cameron, 'Kia mate ururoa, kei mate wheke,' me eke panuku a ia hei te marama o Whiringa ā Rangi, ā, ki te toa ia ka tirotiro anō tana huarahi whakamua, engari ki te hinga, ka tō te rā ki tana umanga whawhai.
E mārama ana a Te Kāea, ka aruaru pea a Sky Arena i a David Tua i tana whawhai ki a Kali Meehan, engari nā āna mahi kura wānanga kāore ia i te wātea ka mutu, ka tukuna he tono ki a Cameron.
I whakapā atu a Cameron ki a Tua ki te whakamōhio atu i a ia.
Ko te wā whakamutunga i whawhai ai a Cameron, ko te marama o Hakihea, ā, i hinga a ia i a Brian Minto.
Hei tāna anō, he ngāwari te whai i tētahi hoariri māmā noa, engari i te hiahia kē ia ki te whawhai i ngā tino toki kaiwhawhai.
