Ka waitohungia tonutia te kerēme o Te Ātiawa iwi ahakoa ngā whakahē a ētahi hapū

Hāunga ngā whakahē a ngā hapū o Otaraua me Manukōrihi, i waitohungia tonutia te whakataunga kerēme o Te Ātiawa iwi ki Ngāmotu i te rangi nei, mā konā e riro ai i te iwi he rawa me ētahi pūtea, he waru tekau mā whitu miriona tāra te wāriu, hei muru i ngā hara o te Karauna ki a rātou.

Nei rā te mana e titia nei e Otaraua me Manukorihi.  Ka anga tonu rātou ki te unu me te poro i tēnei whakataunga kereme, te whakataunga, tōna tikanga e whakaea ana i ngā muru raupatu a Te Karauna ki a Te Ātiawa.

Kīhai ētahi marae e toru o Waitara, tae atu ki Ōwae, i whakaae kia tū te waitohutanga ki ō rātou papa.

Engari ahakoa tēnā, ko te kōrero nui i tēnei huihuinga, he rangi mokopuna tonu tēnei.

Koira te whakapāha nui a te Karauna ki ngā Uri o Te Atiawa mo ngā pakanga o Taranaki i hua ai te rirohanga whenua me te rirohanga tangata.

Kei tēnei whakatau, he waru tekau mā whitu miriona tāra te utu ka whakawhiwhia ki te iwi o Te Atiawa, ko tā te Minita Take Tiriti e mea ana, e tohua ana e tēnei waitohutanga i tētahi tīmatanga hōu mō ngā uri whakaheke.

Ināianei, ka koke tēnei whakatau kia mana tuturu ai i te ture, a, Ko Te Kotahitanga o Te Ātiawa te mana whakahaere i ngā moni me ngā rawa kua hua i tēnei waitohutanga.